Тајван ја спроведе првата заедничка вежба на морнарицата и крајбрежната стража насочена кон одговор во случај Кина да се обиде да воспостави поморска блокада на островот.
Во вежбата биле користени реалистични сценарија со цел подобрување на координацијата меѓу различните служби задолжени за одбраната.
Морнарицата и крајбрежната стража заеднички придружувале и заштитувале трговски брод, додека миноловец обезбедувал безбеден коридор до пристаниште на источниот брег.
Маневрите се дел од десетдневната воена вежба „Хан Куанг“, преку која Тајван се подготвува за различни сценарија во случај на кинеска воена акција.
Во друг дел од вежбата војниците поставиле метални барикади, бодликава жица и бетонски пречки на патот кон еден од клучните мостови во Тајпеј.
Тајванските власти подолго време предупредуваат дека Пекинг би можел да се обиде со блокада да изврши притисок врз островот, а загриженоста дополнително се зголеми по неодамнешните кинески патроли во близина на источниот брег.
Кина го смета Тајван за дел од својата територија, додека демократски избраните власти во Тајпеј ги отфрлаат кинеските претензии за суверенитет.
