По повод Меѓународниот ден на младите младинската група на Асоцијацијата за здравствена едукација и истражување – ХЕРА Млади, заедно со Иницијативата „Фрли ја коцката!“ објави поразителни резултати од националното истражување ЕСПАД 2024: една четвртина од учениците на возраст од 15 до 16 години во земјава се коцкале за пари во последните 12 месеци, или 34 отсто од момчињата и 16 отсто од девојчињата.
Ова се случува во земја во која младинската невработеност кај лицата од 15 до 29 години изнесувала 23,6%, а според Студијата за млади на Фондацијата „Фридрих Еберт“, 45,3% од вработените млади не работат во професијата за која се образувале.
Дури 67,7% од младите имаат одреден степен на желба за иселување, најчесто поради подобар животен стандард, повисоки плати, корупцијата и подобрите можности за вработување, посочуваат организациите.
Иако Собранието неодамна ги изгласа измените на Законот за игрите на среќа со кои се предвидува објектите да бидат оддалечени најмалку 500 метри од основните и средните училишта, на терен сè уште казината и кладилниците останаа спроти школските дворови и градинките, па младинските организации бараат доследна примена на регулативата и контрола на оддалеченоста на коцкарниците и обложувалниците од училиштата како и строга контрола на рекламирањето на игрите на среќа.
