До 18 часот денеска на територијата на Македонија се евидентирани вкупно 15 пожари на отворен простор, од кои два сè уште се активни, еден е ставен под контрола, а 12 се целосно изгаснати, информира Центарот за управување со кризи (ЦУК).
Активен е пожарот во Општина Македонски Брод, кај месноста Видуш во близина на селото Драгов Дол, каде што огнот зафатил ниска вегетација, нискостеблеста шума и грмушки. Вториот активен пожар е во Општина Ново Село, на планината Огражден, каде што гори депонија, мешана деградирана шума и ниска вегетација.
Под контрола е ставен пожарот на градската депонија во Делчево, каде што противпожарните екипи успеале да го локализираат огнот и да спречат негово понатамошно ширење.
Во текот на денот целосно се изгаснати 12 пожари на различни локации низ државата. Интервенции имало кај селото Блатец во Општина Виница, населбата Света Петка во Штип, селото Горенци во Општина Центар Жупа, селото Бачинци во Општина Кичево, во близина на Филтерната станица за вода во Општина Лозово, населбата Средорек во Куманово, селото Милетино во Општина Брвеница, селото Долна Лешница во Општина Желино, селото Слатина во Општина Теарце, во близина на ресторанот „Чифлик“ во Општина Врапчиште, кај селото Трубарево во Општина Гази Баба и кај селото Долно Свиларе во Општина Сарај.
Надлежните служби и понатаму ја следат состојбата на терен и остануваат подготвени за интервенција доколку се појават нови жаришта.
