Во Скопје денеска ќе се одржи регионална средба на здруженијата на превозници од Западен Балкан, на која ќе се разговара за проблемот со кој се соочуваат професионалните возачи при престојот во Шенген зоната.
На средбата ќе се утврдат конкретните активности што превозниците ќе ги преземат во наредниот период, со цел да се изнајде решение за ограничувањето на престојот во земјите од Шенген.
Проблемот особено ги погоди професионалните возачи од земјите од Западен Балкан, откако Европската Унија ги примени правилата според кои на државјаните од земји надвор од Шенген зоната им е дозволен престој до 90 дена во рамките на период од 180 дена.
Превозниците сметаат дека ова правило создава сериозни проблеми за нивниот сектор, имајќи предвид дека возачите поради природата на работата често престојуваат на територијата на Европската Унија.
Тие бараат професионалните возачи да бидат изземени од ограничувањето, бидејќи нивниот престој во Шенген зоната е поврзан со извршување на работните обврски и меѓународниот транспорт на стоки.
Против ваквата одлука превозниците веќе протестираа, но проблемот сè уште не е решен.
На денешната средба во Скопје, која првпат се организира со учество на регионални здруженија, се очекува да присуствуваат претставници на превозниците од Црна Гора, Србија и Босна и Херцеговина.
„Проблемот сè уште не е решен. Средбата се одржува за да ја утврдиме агендата на нашите идни активности“, изјави Биљана Муратовска од Асоцијацијата на превозници – МАКАМТРАНС.
Од средбата се очекува да произлезат заеднички ставови и конкретни чекори со кои превозниците од регионот ќе се обидат да издејствуваат промена на актуелните правила и олеснување на условите за професионалните возачи кои секојдневно работат на релации со земјите од Европската Унија.
