Рибар од Скопје исчезнал во водите на Преспанското Езеро откако скокнал од чамец за да ги земе веслата што му паднале во езерото, соопшти Министерството за внатрешни работи.
Според информациите, случајот вчера бил пријавен во СВР Битола од двајца рибари, кои известиле дека во чамец на Преспанското Езеро останале уште две лица. Едниот од нив скокнал во водата по паднатите весла и не успеал повторно да излезе, додека другиот останал во чамецот, кој поради силниот ветер бил оттурнат кон Крани, на околу еден километар од брегот.
Полициски службеници веднаш излегле на местото и го пронашле Б.Ј. (71) од Скопје, кој им изјавил дека неговиот сопатник М.М. (71), исто така од Скопје, скокнал во езерото и исчезнал под водата.
Од МВР информираат дека во тек е потрага по исчезнатиот рибар, во која се вклучени полициски службеници и специјализирана нуркачка екипа од САЕ „Тигар“.
