Иран и Оман се блиску до договор за воспоставување нова привремена
поморска рута низ Ормускиот Теснец, но Техеран порача дека тоа нема да
биде доволно за целосно нормализирање на пловидбата. Иранските власти
бараат од Соединетите Американски Држави укинување на санкциите, деблокирање на замрзнатите средства, финансиска компензација и прекин на, како што наведуваат, заканите и воените активности против Иран и неговите сојузници.
Министерот за надворешни работи Абас Арагчи изјави дека разговорите со Оман напредуваат, но дека досегашниот режим на пловидба повеќе не е прифатлив за Техеран. Во меѓувреме, безбедносната состојба во Ормускиот Теснец останува нестабилна, откако Обединетите Арапски Емирати соопштија дека нивен танкер бил погоден со ракета, а британската поморска агенција
UKMTO регистрирала нов инцидент со трговски брод.
Оман ги осуди нападите врз пловилата и ги повика сите страни на воздржаност, оценувајќи дека тие можат да ги загрозат тековните преговори. Од американската администрација, пак, наведуваат дека
очекуваат формален договор меѓу Иран и Оман, по што би можело да дојде
до постепено обновување на нормалниот транзит низ стратешкиот морски теснец. Ормускиот Теснец е една од најважните светски енергетски рути, низ која пред кризата минуваше околу една петтина од глобалниот извоз на нафта, а нарушувањето на пловидбата веќе придонесе за раст на цените на енергенсите на светските пазари.
