Американскиот претседател Доналд Трамп порача дека Ормуската Теснина, која е блокирана од иранските сили, ќе биде повторно отворена „многу брзо“, предупредувајќи дека во спротивно Иран ќе се соочи со силен американски напад.
„Протокот ќе биде отворен многу брзо, или тие ќе бидат многу силно погодени, а потоа протокот ќе биде отворен“, изјави Трамп во интервју за „Фокс њуз“.
Изјавата ја даде за време на престојот во јужна Калифорнија, каде што присуствуваше на донаторска вечера за Републиканскиот национален комитет, организирана на неговиот голф-комплекс „Ранчо Палос Вердес“ во областа на Лос Анџелес.
Во меѓувреме, американскиот државен секретар Марко Рубио изјави дека е постигнат одреден напредок во разговорите со Иран и Оман околу Ормуската Теснина, но нагласи дека сè уште нема конечен договор.
Ормуската Теснина е еден од најважните светски поморски коридори за транспорт на нафта, а секое нарушување на пловидбата низ овој теснец има сериозни последици врз глобалните енергетски пазари.
