Водата во Гостивар и понатаму не е безбедна за пиење и подготовка на храна, а надлежните не прецизираат кога ќе биде укината забраната. По денешната седница на Кризниот штаб беше соопштено дека состојбата останува речиси непроменета.
Според надлежните, водата може да се користи само за технички потреби, миење и капење, додека доставата на флаширана вода за пиење до жителите ќе продолжи и во наредниот период.
Откако водоводниот систем беше загаден со фекални бактерии, сега во дел од примероците е детектирана бактеријата Pseudomonas aeruginosa, која може да биде опасна, особено за лицата со ослабен имунитет.
Експертот од ЈП „Водовод и канализација“ – Скопје, Емилија Аневска, која учествува во процесот на санација, објасни дека оваа бактерија најчесто се појавува како биофилм во водоводните цевки и е карактеристична за застоена вода.
„Поради претходната забрана водата воопшто да не се користи, очекувано беше да се појави ваква бактерија. Затоа се постапува според протоколите – зголемено е нивото на хлорирање кај каптажата, а водоводната мрежа се испира во повеќе циклуси. Лабораторискиот мониторинг се спроведува континуирано“, изјави Аневска.
Министерот за внатрешни работи Панче Тошковски, кој раководи со Управувачкиот комитет за координација и управување со системот за управување со кризи, рече дека засиленото хлорирање продолжува и апелираше граѓаните да ја испуштат водата што стои во нивните домашни инсталации, со цел побрзо прочистување на целокупниот систем.
Забраната за употреба на водата во Гостивар беше воведена на 17 јули, а од 27 јули е дозволена само техничка употреба. Иако претходно беше најавувано дека водата ќе стане безбедна за пиење до крајот на минатата недела, тоа сè уште не се случи. Надлежните велат дека јавноста ќе биде известена веднаш штом анализите потврдат дека водата е исправна.
