Институтот за јавно здравје (ИЈЗ) објави препораки за заштита на здравјето при патување, апелирајќи граѓаните навреме да се информираат за здравствените ризици во земјите што планираат да ги посетат.
Од ИЈЗ советуваат најмалку еден месец пред патувањето да се провери дали за дестинацијата се препорачува вакцинација или превентивна терапија, како што се вакцина против жолта треска или заштита од маларија. Истовремено, се препорачува сите патници, особено децата, да имаат примено редовни вакцини, а за дополнителни информации да се консултираат со матичниот лекар или со надлежниот Центар за јавно здравје.
Во патната торба задолжително треба да се понесат редовната терапија, средства за прва помош, лекови против температура и болка, препарати за стомачни тегоби, средство за дезинфекција на раце, репелент против инсекти, крем за сончање со заштитен фактор од најмалку СПФ 30, како и здравствена документација и полиса за патничко здравствено осигурување доколку ја поседувате.
ИЈЗ препорачува употреба на репеленти против комарци, особено при патување во региони каде што постои ризик од заболувања како денга, чикунгуња, зика или маларија. Се советува користење препарати на база на DEET или икаридин, нанесени според упатствата на производителот. Доколку се користи и крем за сончање, прво треба да се нанесе кремот, а потоа репелентот.
Бремените жени, доилките и децата треба да користат само препарати што се одобрени за нивната возраст и состојба. Дополнително, се препорачува носење светла и лесна облека од природни материјали со долги ракави и ногавици, како и затворени обувки кога условите го дозволуваат.
Од Институтот потсетуваат дека комарците кои пренесуваат денга, чикунгуња и зика се најактивни преку ден, додека комарците што ја пренесуваат маларијата се најактивни од самрак до изгрејсонце. Затоа се препорачува престој во климатизирани простории или во објекти со заштитни мрежи, а при спиење на отворено да се користи мрежа третирана со инсектицид.
Доколку за време на патувањето се појават покачена телесна температура, осип, силна главоболка, повраќање или други симптоми на заболување, неопходно е веднаш да се побара медицинска помош.
Во однос на капењето и рекреацијата на вода, ИЈЗ советува да се користат само уредени и контролирани капалишта, да се избегнува загадена вода, да не се голта вода при капење и да се внимава малите деца да не внесуваат вода во устата. По капење се препорачува туширање со чиста вода и миење на рацете пред јадење. Лицата со отворени рани треба да избегнуваат капење во природни водни површини, а при пловење задолжително да користат спасувачки елек.
Доколку во рок од три недели по враќањето од патување се појават покачена температура или симптоми на заразна болест, граѓаните треба задолжително да го информираат својот лекар каде и кога патувале. Од ИЈЗ потсетуваат и дека по враќањето од одредени земји може привремено да биде одложено доброволното дарување крв.
