Состојбата на двајца од седумте пациенти хоспитализирани со западнонилска треска е критична, информираше директорот на Инфективната клиника, Фадил Цана. Двајцата пациенти, на возраст од 76 и 66 години, се поставени на механичка поддршка поради влошување на здравствената состојба.
Цана денеска изјави дека сите седум потврдени случаи се кај лица од Скопје, а само еден од пациентите имал историја на патување во Грција. Кај уште тројца пациенти дополнително се вршат анализи поради сомнение дека се заразени со истиот вирус.
Според директорот на Инфективната клиника, сите заболени се лица на возраст околу 60 години, односно возрасна група која е изложена на поголем ризик од развој на потешка форма на инфекцијата.
„Седум случаи се потврдени, а кај тројца постои големо сомнение дека може да станува збор за истата инфекција. Пациентот на 66-годишна возраст е хоспитализиран на 26 јули, но поради влошување на состојбата и проценка на лекарите од интензивна нега е интубиран и поставен на механичка вентилација“, изјави Цана.
Тој додаде дека пациентот не патувал надвор од државата и има повеќе придружни заболувања. Останатите пациенти, како што посочи, се стабилни и се лекуваат според современи медицински протоколи.
