Екстремно високите температури и топлотниот бран предизвикаа серија шумски пожари низ Турција, при што најтешка е состојбата во туристичките региони Анталија и Мугла. Поради брзото ширење на огнот, властите спроведоа евакуација на жители и туристи, а затворени се и повеќе сообраќајници.
Пожарите моментално се активни во девет турски покраини, а сувото време и силниот ветер дополнително го отежнуваат нивното ставање под контрола. Огнените јазици брзо се шират низ шумските предели и се приближуваат до населените места.
Поради непосредната опасност, стотици жители и странски туристи се евакуирани од загрозените подрачја во Анталија и Мугла. Во обид да се обезбеди безбедност, властите затворија повеќе локални и регионални патишта, што предизвика прекини во сообраќајот.
Според првичните информации, пожарите веќе оштетиле приватни домови и помошни објекти. Противпожарните служби продолжуваат со интензивни интервенции од воздух и од земја, во обид да ги локализираат активните жаришта и да спречат понатамошно ширење на огнот.
