Во Македонија се потврдени уште три нови случаи на западнонилска треска, соопшти министерот за здравство Сашо Клековски, нагласувајќи дека здравствените институции будно ја следат состојбата и продолжуваат со спроведување на превентивни мерки.
Двајца од новорегистрираните пациенти се хоспитализирани на Клиниката за инфективни болести, додека третиот се лекува на Клиниката за неврологија. Кај пациентот на Неврологија инфекцијата засега е потврдена со еден лабораториски тест, а во тек се дополнителни испитувања за конечна потврда.
„Кај овие пациенти се спроведуваат анализи со повеќе дијагностички методи, вклучително и испитување на ликвор и други примероци, а истовремено се изработуваат и епидемиолошки анкети“, изјави Клековски.
Министерот посочи дека меѓу заболените има лица кои не патувале надвор од државата, што укажува на локална циркулација на вирусот. Дел од случаите се регистрирани во Скопско Поле, додека дополнителни анализи се вршат и за пациент од Велес.
Како превентивна мерка, Центарот за јавно здравје – Скопје веќе започнал дезинсекција во радиус од 200 метри околу местата на живеење на потврдените случаи.
Од Министерството за здравство најавуваат дека понатамошните активности ќе зависат од резултатите од епидемиолошките анкети и анализата на регистрираните случаи, по што ќе се донесе одлука дали ќе биде потребно дополнително прскање против комарци.
