Со свечено испраќање од дворот на црквата „Св. Петар и Павле“ во скопската населба Горно Лисиче, околу 40 коњаници и коњанички денеска го започнаа 48. Традиционален Илинденски коњички марш кон Крушево, продолжувајќи ја долгогодишната традиција посветена на чествувањето на Илинден и на македонските херои.
По свеченото тргнување, учесниците продефилираа низ Општина Аеродром, а првата дестинација на нивното патување вечерва е населбата Долно Лисиче. Утре маршот продолжува кон Петровец и Велес.
Според предвидената маршрута, на 31 јули коњаниците од Горно Лисиче ќе им се придружат на учесниците од Свети Николе, Кичево и Битола, испраќајќи порака за единство, почитување на традицијата и зачувување на македонското историско наследство.
Крајната дестинација на маршот е Крушево, каде што на 2 Август – Илинден, коњаниците ќе учествуваат во централната прослава по повод големиот државен празник.
