Рускиот претседател Владимир Путин не користи ниту мобилен, ниту фиксен телефон за комуникација со државните функционери, туку исклучиво специјални заштитени комуникациски линии, изјави портпаролот на Кремљ, Дмитриј Песков, во интервју за новинарот на списанието „Лајф“, Александар Јунашев.
Како што пренесува рускиот весник „Комерсант“, Песков истакнал дека сите разговори на рускиот претседател се одвиваат преку безбедни комуникациски системи, со цел да се спречи евентуално протекување на доверливи информации.
Тој додал дека за време на празници, вработените во претседателската администрација вообичаено немаат пристап до овие специјални комуникациски канали.
Во меѓувреме, порталот iStories, како и CNN и Financial Times, повикувајќи се на извештај на европска разузнавачка агенција, објавија дека Руската Федерална служба за заштита (ФСО) во последните месеци значително ги засилила безбедносните мерки околу Путин поради наводна загриженост од можен атентат.
Според овие информации, рускиот претседател извесен период престојувал во високо обезбедени бункери, особено во Краснодарската област, додека државните медиуми емитувале претходно снимени прилози за неговите активности.
Во извештаите се наведува и дека бројот на јавни појавувања и посети на различни локации е значително намален, а Путин во текот на 2026 година не посетил ниту еден воен објект, што претходно било редовна практика.
Истиот извештај тврди дека се зајакнати безбедносните мерки и за неговите најблиски соработници. Во нивните домови биле поставени системи за видеонадзор, додека готвачите, телохранителите и фотографите кои работат со претседателот не смеат да користат јавен превоз. Персоналот минува низ двојни безбедносни проверки и користи телефони без пристап до интернет.
Дополнително, се наведува дека се вршат проверки со кучиња трагачи, распоредени се безбедносни сили долж реката Москва поради можна закана од беспилотни летала, а во одредени делови од градот повремено се исклучуваат комуникациските мрежи од безбедносни причини. Според истите извори, ФСО ја контролира и објавата на сите информации поврзани со Путин врз основа на доверлив претседателски декрет.
Извештајот поврзува дел од овие мерки со смртта на генерал-потполковник Фанил Сарваров, чиј автомобил експлодирал во декември 2025 година во близина на неговиот дом во Москва, по што, според истите медиуми, дошло до несогласувања меѓу руските безбедносни служби.
