Целосно реконструираниот градски базен во Кавадарци денеска официјално беше пуштен во употреба, откако Владата преку вториот јавен повик обезбеди инвестиција вредна околу еден милион евра. На свеченото отворање присуствуваа премиерот Христијан Мицкоски, министерот за спорт Борко Ристовски и градоначалникот на Кавадарци, Митко Јанчев.
Со реконструкцијата, базенскиот комплекс доби целосно нов изглед и современи услови за спорт, рекреација и забава. Проектот опфати нов систем за филтрација и пречистување на водата, реконструкција на големиот и малиот базен, поставување водни атракции и тобогани, детски реквизити, ново игралиште, обновени соблекувални, санитарни јазли, лекарска просторија, пристапни патеки и друга придружна инфраструктура.
Од Општина Кавадарци посочија дека станува збор за модерен спортско-рекреативен центар кој нуди безбедни и квалитетни услови за сите генерации и кој ќе биде една од најпосетените летни дестинации во државата.
Градоначалникот Митко Јанчев истакна дека ова е прва темелна реконструкција на базенот по неговата изградба пред четири децении.
„По 40 години, Кавадарци добива современ и комплетно обновен рекреативен центар. Ова е инвестиција обезбедена со поддршка од Владата преку унгарскиот заем и претставува целосен грант за Општина Кавадарци“, рече Јанчев.
Министерот за спорт Борко Ристовски нагласи дека Владата ќе продолжи да вложува во спортската инфраструктура низ целата држава, со цел да создаде подобри услови за рекреација, развој на спортот и здрав начин на живот.
„Ќе инвестираме во сè што значи развој на спортот и рекреацијата, за што повеќе деца и граѓани да имаат можност активно да спортуваат и да водат здрав живот“, изјави Ристовски.
Премиерот Христијан Мицкоски оцени дека обновениот базен има значење не само за Кавадарци, туку и за целиот регион.
„Од целосно запуштен објект, кој беше симбол на едно минато време, денес добиваме современ спортско-рекреативен центар исполнет со содржини. Особено ме радува што гледам како најмладите веќе уживаат во она што го изградивме за нив“, порача Мицкоски.
10 наслови за веб-сајт
