Францускиот селектор Дидие Дешан испиша нова страница во историјата на Светските првенства. Со победата над Мароко во четвртфиналето, тој стигна до јубилејната 20-та мундијалска победа, со што стана првиот тренер во историјата на турнирот со такво достигнување.
На вечната листа зад него се наоѓа легендарниот германски селектор Хелмут Шен, кој со репрезентацијата на Западна Германија оствари 16 победи на светските првенства.
По триумфот над Мароко, Дешан истакна дека патот до полуфиналето не бил лесен, но дека неговиот тим успеал да ја надмине големата пречка.
„Натпреварот беше тежок. Не реализиравме пенал и пропуштивме неколку добри можности. Сега сме таму каде што сакавме да бидеме. Во Франција чувствувам голема возбуда и страст. Играчите знаат дека имаат одговорност да дадат сè од себе и да стигнат што подалеку“, изјави Дешан.
Французинот веќе 14 години е на селекторската позиција и со репрезентацијата постигна големи успеси. Под негово водство „триколорите“ играа финале на Светското првенство во 2018 и 2022 година, а сега се борат за ново финале и можност за хет-трик настапи во завршницата на Мундијалите.
Од актуелниот состав на Франција, Килијан Мбапе, Усман Дембеле и Лукас Ернандес се меѓу играчите кои настапуваа и на турнирите во 2018 и 2022 година, а сега имаат можност повторно да се борат за највисок пласман.
