Израел им доставил на Соединетите Американски Држави нови разузнавачки информации за наводен нов ирански план за атентат врз американскиот претседател Доналд Трамп. Според извори запознаени со случајот, информациите би можеле дополнително да ги зголемат тензиите меѓу Вашингтон и Техеран, објавува „Волстрит џурнал“.
Иран со години јавно се заканува со одмазда кон Трамп поради ликвидацијата на генералот Касем Сулејмани, командант на елитните сили на Иран, кој беше убиен во американски напад за време на неговиот прв претседателски мандат. По смртта на Сулејмани, на неговиот погреб беа упатени закани кон Трамп, а беа истакнати и транспаренти со пораки за одмазда.
Говорејќи пред новинарите во Анкара, Трамп изјави дека верува оти е главна цел на Иран.
„Тие сакаат да го елиминираат американскиот лидер – мене. Јас сум на секоја нивна листа. Досега имав среќа, но не знам колку долго ќе трае тоа“, изјави американскиот претседател.
Белата куќа се повика на извештајот на „Волстрит џурнал“, додека израелската амбасада во Вашингтон одби да го коментира случајот. Од иранската мисија при Обединетите нации засега нема официјален одговор.
Според американскиот весник, односите меѓу Доналд Трамп и израелскиот премиер Бенјамин Нетанјаху во последните недели се влошиле поради различните ставови околу конфликтот со Иран.
Нетанјаху се залагал за продолжување на воените операции, додека Трамп настојувал да се избегне понатамошна ескалација поради можните последици врз светската економија. Минатиот месец САД посредуваа во постигнување кревко примирје со Иран.
Иако комуникацијата меѓу двајцата лидери продолжила, разговорите, според „Волстрит џурнал“, станале значително потензични. Во четвртокот тие повторно разговарале, по што кабинетот на Нетанјаху соопшти дека двете земји ќе ја продолжат блиската координација и соработката околу безбедносните прашања.
