Франција е првиот полуфиналист на Светското првенство, откако во четвртфиналето во Бостон со сигурни 2:0 го совлада Мароко и обезбеди место меѓу четирите најдобри репрезентации на турнирот.
Французите беа подобар противник во текот на целиот натпревар и уште во првото полувреме можеа да стекнат убедлива предност. Килијан Мбапе не успеа да реализира пенал, откако мароканскиот голман Боно го одбрани неговиот удар, а „триколорите“ пропуштија уште неколку одлични можности.
Иницијативата на Франција конечно беше крунисана во 60. минута, кога Мбапе со прецизен удар од околу дваесет метри го совлада Боно и донесе водство од 1:0.
Само шест минути подоцна следуваше нов удар за Мароко. Усман Дембеле ја затресе мрежата за 2:0 и практично ги реши сите дилеми околу победникот.
До крајот на натпреварот Мароко се обиде да се врати во игра, но не успеа да го совлада францускиот голман, додека Франција пропушти уште една добра можност преку Матета да ја направи победата уште поубедлива.
Со оваа победа Франција стана првата селекција што обезбеди место во полуфиналето на Мундијалот.
