Пратеникот во Собранието на Македонија, Беким Ќоку, тврди дека нему, на уште еден пратеник и на заменик-генералниот секретар на Владата им бил одбиен влез во Албанија, без, како што наведува, да добијат какво било официјално образложение од албанските власти.
Според Ќоку, тројцата функционери, сите етнички Албанци од Македонија, биле задржани повеќе од еден час на граничниот премин Ќафасан при влез во Албанија.
„Тројца албански државни функционери од Македонија, двајца пратеници и заменик-генералниот секретар на Владата, се соочивме со необјаснива ситуација на влез во Република Албанија. Едно рутинско преминување на границата се претвори во апсурдна драма“, наведува Ќоку.
Тој тврди дека по повеќе од еден час чекање без никакво објаснување, ним им било дозволено да продолжат, но дека на едно лице кое било со нив во друго возило му бил забранет влезот. Поради тоа, одлучиле да се вратат назад во Македонија.
„Во кабината каде што ги предадовме пасошите, македонскиот полицаец ни кажа дека, според потврдата од неговиот албански колега, забраната за влез важела и за нас тројцата. Зошто претходно ни дозволија да поминеме, останува енигма“, пишува Ќоку.
Тој додава дека до овој момент не добиле никакво официјално решение или известување за причините поради кои им бил забранет влезот.
Ќоку наведува дека доколку причината е неговата јавна поддршка за неодамнешните протести во Албанија кои беа против Рама, тоа би било сериозно загрижувачко.
