Основното јавно обвинителство за гонење организиран криминал и корупција поднесе обвинителен акт против три лица и обвинителен предлог против уште едно лице во врска со стечајот на Еуростандард банка. Тројцата се товарат за кривичното дело „Предизвикување стечај на банка“, додека четвртото лице се гони за „Несовесно работење во службата“.
Според Обвинителството, обвинетите во периодот од 2013 до втората половина на 2019 година постапувале спротивно на Законот за банките и интерните акти на банката. Како членови на управните и надзорните органи, тие одобрувале кредити на кредитно неспособни и поврзани правни лица без соодветни анализи и обезбедување. Воедно, според обвинението, ја прикривале реалната финансиска состојба и ризиците и доставувале неточни информации до Народната банка. Со таквото постапување придонеле за сериозно влошување на финансиската состојба на Еуростандард банка и нејзино доведување во стечај. Обвинителството наведува дека доверителите претрпеле штета од 1.662.417.664 денари.
За четвртообвинетиот се наведува дека како претседател на Надзорниот одбор не извршувал соодветен надзор и овозможил преземање прекумерни кредитни ризици и одобрување нефункционални кредити. Со тоа, според обвинението, придонел за создавање несолвентност и намалување на сопствените средства на банката.
Првообвинет е Николчо Петковски, второобвинет е Коста Костовски, третообвинет е Зоран Николовски, а четвртообвинет е Трифун Костовски. За обвиненијата ќе одлучува Основниот кривичен суд Скопје.
