Претседателката на Република Македонија, Гордана Сиљановска-Давкова, денеска учествува на самитот на Северноатлантскиот совет, кој се одржува на ниво на шефови на држави и влади во претседателскиот комплекс „Бештепе“ во Анкара.
Во своето обраќање пред медиумите, Сиљановска-Давкова порача дека иднината на Европа треба да се гради врз темелите на единството, мирот и демократските вредности.
„Мотото ‘Посилна Европа – Посилно НАТО’ за мене значи дека проширена и обединета Европа е посилна Европа. Но, најсилна е Европа која живее во мир и демократија, заснована на принципи и вредности“, истакна претседателката.
Во рамки на самитот, Сиљановска-Давкова ќе се обрати пред лидерите на 32-те земји членки на Алијансата, а предвидени се и повеќе билатерални средби со претставници на државите членки на НАТО.
Претходно, македонската претседателка присуствуваше на прием организиран од турскиот претседател Реџеп Таип Ердоган, каде, како што информираше, биле разменети мислења за идните безбедносни предизвици, јакнењето на колективната одбрана и унапредувањето на трансатлантската соработка.
Во состав на македонската делегација се и министерот за одбрана Владо Мисајловски, министерот за надворешни работи и надворешна трговија Тимчо Муцунски, како и началникот на Генералштабот на Армијата, генерал-мајор Сашко Лафчиски.
На самитот главни теми се зајакнувањето на безбедноста на Алијансата, зголемувањето на инвестициите во одбраната, развојот на одбранбената индустрија и продолжувањето на поддршката за Украина.
