Играчот за врска на Бразил, Каземиро, не го криеше разочарувањето по елиминацијата на репрезентацијата од Светското првенство по поразот од Норвешка.
Искусниот фудбалер изјави дека целата репрезентација е длабоко разочарана бидејќи не успеала да ја исполни целта и да им донесе радост на милионите бразилски навивачи.
„Сите Бразилци се разочарани затоа што повторно испаднавме. Тажни сме бидејќи дадовме сè од себе за да ја оствариме нашата цел. Верувам дека во текот на целиот натпревар бевме подобар тим од Норвешка, но таков е фудбалот“, изјави Каземиро.
Тој не можеше да ги задржи солзите за време на интервјуто и призна дека репрезентацијата не ги оправдала огромните очекувања.
„Не се одвиваше онака како што посакувавме. Имаме квалитет да стигнеме многу подалеку, но не ги оправдавме очекувањата на повеќе од 210 милиони Бразилци“, рече тој.
Каземиро истакна дека освојувањето на светската титула е сон на секое бразилско дете и дека се чувствува привилегиран што трипати имал можност да настапи на Светско првенство.
„Тешко е да се најдат вистинските зборови. Сон на секое бразилско дете е да го освои Светското првенство. Јас имав три шанси да го доживеам тоа и се чувствувам привилегиран. Горд сум на сè што постигнавме јас и моите соиграчи. Работевме напорно и дадовме максимум. Свесни сме дека разочаравме повеќе од 210 милиони луѓе, но животот продолжува. Во вакви моменти единствено сакам да бидам со моето семејство“, изјави Каземиро.
И покрај болната елиминација, тој порача дека и понатаму со голема чест и гордост ќе го носи дресот на бразилската репрезентација.
