Минималната плата во Србија ќе се зголеми за 9,4 проценти од 1 октомври годинава, на 58.630 динари, односно 500 евра, беше одлучено на седница на Социјалниот и економски совет. Цената на работен час ќе се зголеми од 308 на 337 динари.
Претседателката на СЕС и министерка за труд, Милица Ѓурѓевиќ Стаменковски, изјави дека одлуката за вонредното зголемување е донесена едногласно и е резултат на социјалниот дијалог во Србија.
Минималната плата во Србија сега изнесува 53.592 динари, или 457 евра, откако беше зголемена за 13,7 проценти во јануари оваа година.
Во јуни, министерот за финансии Синиша Мали најави вонредно зголемување на минималната плата, што значи дека од 1 октомври минималната плата ќе биде 500 евра, а од јануари следната година ќе има ново зголемување на 550 евра.
