ВМРО-ДПМНЕ преку соопштение оцени дека позитивната оценка од Европската комисија претставува потврда за реформскиот напредок на Македонија во рамки на Планот за раст на Европската Унија.
Од партијата наведуваат дека, според нивните информации, Македонија заедно со Албанија и Црна Гора е меѓу земјите кандидати кои бележат најголем напредок во спроведувањето на Реформската агенда и исполнувањето на обврските од Планот за раст.
„Позитивната оценка е признание за успешно спроведените реформи и дополнителен мотив Владата да продолжи со уште посилна динамика во нивната реализација“, велат од ВМРО-ДПМНЕ.
Според партијата, оценката од Европската комисија ги демантира критиките на СДСМ дека државата не ги исполнува своите обврски кон Европската Унија.
Во соопштението се наведува дека усвојувањето на Изборниот законик, како дел од Реформската агенда, е обврска што произлегува од процесот на консултации во рамки на работната група при Министерството за правда и е усогласена со препораките на ОБСЕ и ОДИХР.
Од ВМРО-ДПМНЕ додаваат дека ја поздравуваат определбата на Европската комисија реформскиот напредок да биде клучен критериум за распределба на средствата за земјите кандидати и изразуваат очекување Македонија во текот на јули да ја добие финансиската поддршка.
Воедно, упатуваат благодарност до Делегацијата на Европската Унија во Скопје, амбасадорот Михалис Рокас и неговиот тим за континуираната поддршка во спроведувањето на реформите.
