Опозициската СДСМ смета дека понудените измени во Изборниот законик за електронско гласање на дијаспората се „нов изборен грабеж со злоупотреба на 200.000 гласа” бѝдејќи, потсетуваат, дијаспората и сега гласа, а измените што ги предлага ВМРО-ДПМНЕ се за 2029 година.
„Целта на Мицкоски е изборен грабеж и злоупотреба на 200.000 гласа затоа што поддршката од граѓаните му падна и сака изгубените гласови во Македонија да ги надомести преку злоупотреба со „електронско гласање” од надвор“, нагласува СДСМ.
Левица нагласува дека нивното барање било една изборна единица и укинување на парите за рекламирање, но владејачката партија не ги прифатила.
„Обвинувањата на ВМРО-ДПМНЕ за Левица се трагикомични. Тие доаѓаат од партијата која зема најголем дел од колачот и на платеното политично рекламирање, со двоцифрени проценти, и партија со најдебела каса, најимотна, не само во регионот, туку и во Европа”, нагласува Левица во соопштение.
Владејачката ВМРО-ДПМНЕ обвини дека Филипче и Апасиев настапуваат синхронизирано во обидот да го блокираат донесувањето на новиот Изборен законик. Со поднесување на десетици илјади амандмани тие го кочат законското решение кое со месеци беше усогласувано со учество на сите политички партии.
„Очигледно е дека ниската доверба како и падот на рејтингот на СДСМ и Левица ги наведуваат на политички блокади наместо на конструктивна работа. Наместо да помогнат државата да ги исполни реформските цели и да го задржи темпото во користењето на средствата од Планот за раст, тие избираат конфронтација и опструкција“, нагласи портпаролот Валентин Манасиевски.
