Собранието денеска не ја изгласа интерпелацијата за работата на министерот за внатрешни работи Панче Тошковски, која ја поднесе опозициската Левица. За интерпелацијата гласаа 19 пратеници, додека 58 беа против.
Ова е втора интерпелација за Тошковски во последниот период. На претходната, одржана на 29 април, против интерпелацијата гласаа 72 пратеници.
За време на расправата, од новинарската галерија беше забележано дека пратеникот Љупчо Пренџов ги повикувал колегите од коалицијата „Вреди“, кои се упатуваа надвор од пленарната сала, да останат уште десетина минути за да ја проследат одбраната на министерот по излагањето на лидерот на Левица, Димитар Апасиев.
Во текот на дебатата, Левица и СДСМ упатија критики за, како што наведоа, неефикасност и политизација на полицијата, посочувајќи пораст на криминалот, убиствата, семејното насилство, сексуалните кривични дела и трговијата со деца.
Пратениците од опозицијата побараа оставка од министерот, оценувајќи дека треба да понесе политичка одговорност за безбедносните пропусти.
Тошковски, пак, истакна дека институциите работат и дека критиките се насочени кон оние кои преземаат активности. Тој повторно повика на емпатија кон семејствата погодени од трагедијата во Кочани и оцени дека барањата за негова оставка претставуваат обид за собирање политички поени врз туѓа несреќа.
Опозициските пратеници останаа на ставот дека министерот требало одамна да се повлече од функцијата поради, како што велат, низата безбедносни пропусти и скандали во изминатите две години.
