Две момчиња, на возраст од две и четири години, денеска биле пронајдени без знаци на живот во автомобил во југоисточниот француски град Карпентрас, во период кога Франција е зафатена од екстремен топлотен бран.
Според информациите на француските медиуми, браќата биле пронајдени околу пладне во возило паркирано во близина на семејниот дом. Обвинителството соопшти дека причината за смртта сè уште не е официјално утврдена, а истрагата е во тек.
Обвинителката од Карпентрас, Хелен Мурж, изјави дека една од главните насоки на истрагата е влијанието на високите температури, со оглед на тоа што регионот се соочува со исклучително жешко време.
Трагедијата се случува во момент кога Франција е погодена од силен топлотен бран. Во понеделник, 49 департмани беа ставени под црвено ниво на тревога поради високите температури, додека во голем дел од останатите региони беше прогласено портокалово предупредување.
Во регионот Воклиз температурите се приближиле до 40 степени Целзиусови, а поради екстремните горештини биле затворени 1.352 училишта, соопшти француското Министерство за образование.
Надлежните институции апелираат до граѓаните да бидат особено внимателни за време на топлотниот бран и да не оставаат деца или други лица во паркирани возила, бидејќи температурата во нив може опасно брзо да се зголеми.
