Д-р Емилија Котеска Аврамчева почина во раните утрински часови од последиците на тешката сообраќајна несреќа што вчера попладне се случи на автопатот кај влезот во Варшава.
Од Македонската амбасада во Варшава изразија длабоко сочувство до нејзиното семејство – ќерката Магдалена, синот Константин, мајката и сестрата, оценувајќи дека станува збор за огромна и ненадоместлива загуба.
Во објавата се истакнува дека д-р Котеска Аврамчева била успешен лекар, менаџер на приватна поликлиника во Жирардов со повеќе од 70 лекари, претприемач и долгогодишен поддржувач на македонската заедница во Полска. Како ќерка на бегалец од Егејска Македонија, активно учествувала во бројни иницијативи поврзани со Македонија и секогаш била подготвена да помогне.
Само пред десетина дена донирала средства за спомен-обележје во Полице, град кој бил собирен центар за децата бегалци во 1949 година. Амбасадата наведува дека благодарение на нејзините контакти со полските институции одиграла клучна улога во организирањето лекување на двајца пациенти по трагедијата во Кочани.
Минатата година, по повод националниот празник на Македонија, таа го обезбедила присуството на поранешниот полски премиер Лешек Милер на приемот организиран од Амбасадата.
„Беше неуморна, енергична и храбра жена, секогаш подготвена да помогне. За македонската заедница во Полска ова е ненадоместлива загуба и заминување на личност која беше симбол на меѓусебното поврзување на Македонците во оваа земја“, се наведува во соопштението.
Според информациите од полските медиуми, трагедијата се случила кога Котеска Аврамчева го запрела своето возило на лентата за итни случаи на експресниот пат С8 Варшава–Прушков, кај крстосницата Опач-Колонија. По излегувањето од автомобилот, била удрена од автобус.
Несреќата се случила околу 15:50 часот, по што на местото веднаш интервенирале противпожарни екипи, Итна медицинска помош и хеликоптер на воздушната амбуланта. Лекарските тимови извршиле реанимација и ја транспортирале во болница, но таа им подлегнала на повредите во раните утрински часови.
Полските надлежни органи спроведуваат истрага за утврдување на сите околности што довеле до трагичниот настан.
