Бразилската репрезентација се врати на победничките патеки на Светското првенство откако во второто коло убедливо го совлада Хаити со 3-0 и направи голем чекор кон пласман во нокаут-фазата.
По неочекуваното реми на стартот од турнирот, „кариоките“ прикажаа далеку подобро издание и уште во првото полувреме ги решија сите дилеми околу победникот.
Селекторот Карло Анчелоти направи важна промена во почетниот состав, а довербата што му ја укажа на Куња се покажа како полн погодок. Напаѓачот беше најрасположен на теренот и со головите во 23. и 36. минута му донесе сигурно водство на Бразил од 2-0.
Конечните 3-0 ги постави Винисиус Жуниор во судиското продолжение од првиот дел, по што Бразилците во второто полувреме рутински го контролираа натпреварот и без проблеми ја зачуваа предноста.
Во вториот натпревар од групата, Мароко стигна до значајна победа над Шкотска со минимални 1-0.
Победничкиот гол беше постигнат уште во втората минута, кога Саибари ја затресе мрежата на Шкотланѓаните. Иако Шкотска до крајот се обидуваше да стигне барем до бод, Мароканците одиграа цврсто во одбраната и успешно ја сочуваа предноста до последниот свиреж.
