Во петок и сабота коалициските партнери ВМРО-ДПМНЕ, ВЛЕН и ЗНАМ ќе одржат состаноци посветени на можната реконструкција на Владата. Информацијата ја потврди премиерот Христијан Мицкоски, кој истакна дека очекува продолжување на добрата соработка со ВЛЕН.
„Имаме коректна и пријателска соработка со нашиот коалициски партнер ВЛЕН и очекувам тоа така и да продолжи. По изборите во 2024 година следеа локални избори на кои тие остварија убедлива победа во десет општини, па не гледам причина нашата соработка да не продолжи и понатаму“, изјави Мицкоски.
И во ВЛЕН со внимание го очекуваат состанокот со премиерот. Лидерот на движењето, Билал Касами, посочи дека најпрво сакаат да ја слушнат визијата на Мицкоски, иако веќе имаат сопствен концепт за реконструкција на владините ресори.
„Не можеме да зборуваме пред да се сретнеме со премиерот. Имаме наш концепт за разговорите околу реконструкцијата на Владата, но треба да ја видиме и визијата на премиерот. Потоа ќе можеме да кажеме дали ќе има само промени во рамките на ВЛЕН или и ротација на министерства“, рече Касами.
Осврнувајќи се на можноста за предвремени парламентарни избори, Касами оцени дека во моментов фокусот е ставен на реализацијата на владината програма. Според него, државата нема потреба од предвремени избори, иако ВЛЕН има капацитет да оствари победа доколку тие би се одржале сега.
Во меѓувреме, лидерот на ДУИ, Али Ахмети, неодамна излезе со став дека предвремени парламентарни избори треба да се организираат напролет и повика на мобилизација на партиските структури. Од друга страна, премиерот Мицкоски останува на позицијата дека парламентарните избори треба да се одржат во редовниот термин во 2028 година.
