Денеска во Македонија ќе преовладува променливо облачно и топло време со сончеви периоди, информираат од Управата за хидрометеоролошки работи.
Ќе дува слаб до умерен ветер од северозападен правец, а во попладневните часови на повеќе места се очекува развој на локална нестабилност проследена со пороен дожд, грмежи и засилен ветер.
Утринските температури ќе се движат од 9 до 18 степени, додека максималната дневна температура ќе достигне меѓу 23 и 34 степени.
Во Скопје се очекува слично време – променливо облачно и топло со сончеви периоди. Во попладневните часови во делови од котлината ќе има услови за пороен дожд, грмежи и засилен ветер. Максималната температура во главниот град ќе достигне до 32 степени.
Според прогнозата на УХМР, топлото време ќе продолжи и во наредните денови. Утре на повеќе места ќе биде нестабилно со пороен дожд, грмежи и засилен ветер, а локално се очекуваат и поинтензивни процеси со пообилни врнежи и услови за ретка појава на град.
Од четврток повторно се очекува претежно сончево време со умерена облачност во текот на денот и слаб до умерен ветер од северен правец.
