Полицијата го идентификуваше и приведе осомничениот за пожарот што денеска ги зафати возилата паркирани пред Амбасадата на Бугарија во Скопје.
Според информациите од Министерството за внатрешни работи, станува збор за И.Д. (44) од Скопје, кој е лишен од слобода и задржан во полициска станица.
Од МВР информираат дека веднаш по пријавата за пожарот, добиена во 12:13 часот, полициски екипи започнале интензивна истрага за откривање на сторителот и обезбедување докази.
Во краток рок бил идентификуван и пронајден осомничениот, а при преземените активности била пронајдена и облеката што ја носел за време на инцидентот.
Во координација со јавен обвинител продолжува документирањето на случајот, по што против осомничениот ќе биде поднесена соодветна кривична пријава по итна постапка.
Полицијата објави и снимка од безбедносните камери на која, според нивните наводи, се гледа лице кое се приближува до возилата, по што избувнува пожар и го напушта местото на настанот.
Истрагата продолжува со цел целосно да се утврдат сите околности поврзани со случајот.
