Министерот за надворешни работи и надворешна трговија Тимчо Муцунски денеска оствари телефонски разговор со бугарската министерка за надворешни работи Велислава Петрова-Чамова, по инцидентот во кој беа опожарени возила во сопственост на Амбасадата на Бугарска амбасада во Скопје.
Муцунски остро го осуди настанот и ја информираше својата бугарска колешка дека надлежните институции во државата веќе преземаат мерки за целосно расчистување на случајот, утврдување на околностите и изведување на сторителите пред лицето на правдата.
Тој нагласи дека Министерството дава целосна поддршка на истражните органи за брза, ефикасна и транспарентна постапка со цел целосно расветлување на случајот.
Осуда за инцидентот пристигна и од македонските и од бугарските институции, при што од бугарското Министерство за надворешни работи беше наведено дека ваквите настани се резултат на агресивен политички говор и поттикнување омраза.
Бугарските медиуми објавија и видео-снимка на која се гледа како непознато лице наводно ги полева возилата со запалива течност пред објектот на амбасадата, по што истите се запалуваат.
Од Министерство за внатрешни работи на Северна Македонија информираа дека случајот бил пријавен околу 12:13 часот, по што полициски службеници излегле на терен и констатирале дека се работи за делумно опожарени возила „киа“ и „сузуки“ во сопственост на дипломатската мисија.
Надлежните служби продолжуваат со истрага за целосно расчистување на случајот.
