Апелацискиот суд во Скопје ја потврди едногодишната затворска казна за поранешниот градоначалник на Карпош, Стевчо Јакимовски, во предметот поврзан со бесправно градење на општинската административна зграда.
Во изречената казна се пресметува и времето кое тој го поминал во куќен притвор во 2019 година, околу пет месеци, поради што му останува да издржи уште приближно седум месеци затвор.
Во исто време, судот ја уважи жалбата на Јакимовски за делото злоупотреба на службена положба и овластување, при што тој дел од предметот е вратен на повторно судење. Укината е и условната осуда за второобвинетиот, а постапката ќе се води повторно пред друг судија.
Првостепената пресуда предвидуваше вкупна казна од три и пол години затвор, од кои една година за бесправно градење и три години за злоупотреба на службената положба. По одлуката на Апелацискиот суд останува само казната од една година затвор.
По објавувањето на одлуката, Јакимовски одржа вонредна прес конференција во која оцени дека постапката против него е политички мотивирана и дека има цел да го спречи неговото учество на евентуални идни избори за градоначалник на Карпош.
Тој додаде дека ќе поднесе жалба до повисоките судски инстанци и изрази очекување дека Врховниот суд ќе ја укине одлуката.
