Кривичниот совет при Основниот кривичен суд Скопје ја уважи жалбата на осомничениот С.Б. и ја прифати понудената гаранција, со што му е укината мерката притвор што претходно му беше определена.
Од Судот информираат дека Советот постапувал по жалба против решението на судија на претходна постапка од 4 јуни 2026 година, со кое, по предлог на надлежен јавен обвинител, на осомничениот му бил определен притвор во траење од 30 дена.
Прифатената гаранција изнесува 55.000 евра во денарска противвредност и ќе биде депонирана во корист на Република Северна Македонија како обезбедување за неговото присуство во текот на понатамошната постапка.
Покрај укинувањето на притворот, Судот му изрече и мерки на претпазливост. На осомничениот му е привремено одземена патната исправа, а изречена му е и забрана за преминување на државната граница.
Од Основниот кривичен суд нагласуваат дека доколку С.Б. не ги почитува определените мерки, може да му бидат изречени построги мерки за обезбедување на неговото присуство во постапката.
