Во текот на изминатите 24 часа, полициски службеници низ државата привеле 21 лице поради безобѕирно управување со моторни возила, информира Министерството за внатрешни работи.
Според податоците на МВР, 13 од приведените возачи управувале возило без возачка дозвола, седуммина биле под дејство на алкохол, додека едно лице возело и покрај важечка забрана за управување.
Од возачите затекнати без возачка дозвола, петмина се од Скопје, двајца од тетовскиот регион, а по едно лице од Македонска Каменица, Куманово, Гостивар, Кичево, Дебар и Битола.
Кај седум возачи било утврдено присуство на алкохол. Тројца биле приведени во Скопје, а по еден во Свети Николе, Куманово, Тетово и Велес.
Во Кичево, пак, бил приведен возач кој управувал возило иако имал изречена забрана за возење.
Од МВР најавуваат дека по целосното документирање на случаите ќе бидат поднесени соодветни кривични пријави.
Министерството повторно апелира до сите учесници во сообраќајот да ги почитуваат правилата и прописите, да не управуваат возило без возачка дозвола, под дејство на алкохол или во период кога имаат забрана за управување, со цел да се зголеми безбедноста на патиштата.
