Министерството за надворешни работи и надворешна трговија соопшти дека Обединети нации ја избрале Северна Македонија за членка на ЕКОСОК за мандатниот период 2027–2029 година, оценувајќи го тоа како значаен успех за македонската дипломатија и прво вакво членство на државата во едно од главните тела на системот на ОН.
Сепак, од опозицискиот СДСМ реагираат дека станува збор за рутинска процедура, а не за историски дипломатски пробив.
Од партијата наведуваат дека ЕКОСОК има 54 членки и дека секоја година се избираат по 18 нови држави со мандат од три години, што според нив претставува редовен процес во рамки на Обединетите нации.
Тие додаваат дека членството е резултат на долгорочна дипломатска активност на повеќе влади, а не исклучиво на актуелната власт, и ја обвинуваат Владата дека се обидува да прикаже рутинска постапка како голем успех.
Во реакцијата, СДСМ оценува дека Владата води пропаганден пристап во отсуство на реални резултати, нагласувајќи дека вистински напредок за државата би бил почеток на пристапните преговори со Европска Унија.
Според нив, наместо конкретни економски и европски резултати, јавноста добива политички маркетинг и нагласување на дипломатски активности кои се дел од редовното функционирање на меѓународните организации.
