Фудбалскиот клуб Шкендија излезе со реакција по одлуката на Фудбалската федерација на Македонија (ФФМ) за едногодишна суспензија во Купот на Македонија и изречена вкупна парична казна од 105.000 евра, поради немилите настани во финалето против Силекс.
Во соопштението од клубот се наведува дека спонзорот на Шкендија бара итно преиспитување и корекција на, како што ја оценуваат, скандалозната одлука на ФФМ.
„Шкендија е еден од ретките клубови што функционира со сериозност, коректност и целосна усогласеност со спортските и финансиските обврски. Нашиот придонес низ годините бараше големи вложувања, труд и жртви. Дополнително, Шкендија е клубот кој со своите достоинствени настапи на европската сцена го зголеми коефициентот на македонскиот фудбал, од што корист имаат сите домашни клубови. Благодарение на тоа, од следната сезона македонскиот фудбал ќе добие дополнително место во европските купови“, се вели во реакцијата.
Од клубот потенцираат дека не прифаќаат одлуки донесени зад затворени врати, со кои, како што наведуваат, се нанесува штета на нивниот проект и придонесот што го даваат за македонскиот фудбал.
„Ваквиот пристап нè принудува да ја разгледаме и можноста за повлекување од клубот, па дури и од фудбалот во Македонија. Доколку ФФМ не ја повлече одлуката, сериозно ќе го преиспитаме нашето понатамошно присуство, бидејќи таа ги нарушува правата и политиките на клубот“, стои во соопштението.
Шкендија додава дека очекува ФФМ да покаже одговорност и да реагира во интерес на спортската правда, клубот и иднината на македонскиот фудбал.
