Македонија е избрана за членка на Економскиот и социјален совет на Обединетите нации (ЕКОСОК), откако на гласањето во седиштето на светската организација во Њујорк доби поддршка од 174 држави членки.
Министерот за надворешни работи и надворешна трговија, Тимчо Муцунски, оцени дека станува збор за историски успех на македонската дипломатија, бидејќи ова е првпат од независноста државата да стане членка на едно од главните тела во системот на Обединетите нации.
Според него, изборот претставува значајна потврда за кредибилитетот на Македонија и за активната улога што земјата ја има во мултилатералната дипломатија.
„Ова е успех на македонската дипломатија. Успех на посветеност, доверба и работа која често се одвива далеку од очите на јавноста, но носи конкретни резултати. Ова е дипломатски успех кој не се мери само со изборот, туку и со довербата што стои зад него“, истакна Муцунски.
Тој нагласи дека членството во ЕКОСОК претставува уште еден важен чекор во зајакнувањето на позицијата на Македонија во меѓународните институции, по учеството во Советот за човекови права на Обединетите нации и Извршниот совет на Организацијата за забрана на хемиското оружје.
Со членството во ЕКОСОК, Македонија ќе има можност поактивно да учествува во креирањето и спроведувањето на глобалните политики поврзани со економскиот и социјалниот развој, одржливиот развој, хуманитарните прашања и човековите права.
Од Министерството оценуваат дека ова ќе придонесе за дополнително зајакнување на меѓународната видливост на државата, како и за унапредување на нејзиниот углед и кредибилитет на светската сцена.
Економскиот и социјалниот совет е еден од шесте главни органи на Обединетите нации и има клучна улога во координирањето на економските, социјалните и развојните политики во рамките на организацијата.
