ВМРО-ДПМНЕ преку соопштение упати остри критики кон претседателот на СДСМ, Венко Филипче, обвинувајќи го дека не ги брани македонските позиции и дека неговите ставови се во линија со официјална Софија.
Од владејачката партија наведуваат дека Филипче поддржува политики кои, според нив, бараат нови отстапки од Македонија без јасни гаранции за напредок во евроинтегративниот процес.
„СДС и Венко Филипче не нудат визија, план или решенија. Нивната политика се сведува на безусловно прифаќање на барањата што доаѓаат однадвор, без доволна грижа за државните интереси“, стои во реакцијата на ВМРО-ДПМНЕ.
Во соопштението се посочува дека државата се соочува со предизвици поврзани со националниот идентитет, јазикот и историјата, а според партијата, Филипче не обезбедува подобра преговарачка позиција за Македонија.
Од ВМРО-ДПМНЕ оценуваат и дека јавните настапи на лидерот на СДСМ се насочени кон политичка промоција, а не кон заштита на државните интереси.
„Македонија нема да оди напред преку понижувања, уцени и национални отстапки. Напредокот е можен само преку политики што ги штитат државните и национални интереси“, се наведува во соопштението.
Партијата додава дека останува посветена на европската интеграција на земјата, но нагласува дека процесот мора да биде кредибилен, предвидлив и заснован на јасни принципи.
