Времето денеска во Македонија ќе биде променливо облачно со повремени врнежи од дожд и локална појава на грмежи, информираат од Управата за хидрометеоролошки работи.
Според прогнозата, на повеќе места во земјата ќе има развој на нестабилна облачност, а локално временските процеси ќе бидат поинтензивни и ќе прераснат во невреме. Се очекува пообилен пороен дожд, со количини кои на одредени места можат да надминат 20 литри на квадратен метар, како и електрични празнења, засилен ветер и појава на град.
Утринските температури ќе се движат од 9 до 16 степени, додека максималната дневна температура ќе достигне од 21 до 29 степени Целзиусови.
Во Скопје времето ќе биде променливо облачно со повремени врнежи од дожд. Во делови од котлината се очекува развој на нестабилност, проследена со интензивен пороен дожд, грмежи, силен ветер и можност за изолирана појава на град.
Минималната температура во главниот град ќе изнесува околу 14 степени, а максималната ќе достигне до 27 степени.
Од УХМР најавуваат дека и во следните денови ќе продолжи периодот на променливо време со сончеви периоди и локална нестабилност во попладневните часови.
Особено внимание се препорачува во текот на сабота и понеделник, кога повторно се очекуваат поинтензивни временски процеси со пообилен пороен дожд, грмежи, засилен ветер и услови за локално невреме во повеќе делови од земјата.
