Младата полска тенисерка Маја Хвалинска продолжува да ја воодушевува тениската јавност со своите настапи на Ролан Гарос, откако успеа да обезбеди место во полуфиналето на престижниот грен слем турнир во Париз.
На почетокот од турнирот таа низ шега изјави дека речиси никој не ја познава, но по неколку недели фантастични настапи на париската глина, нејзиното име стана една од најголемите приказни на годинашното издание на турнирот.
Во четвртфиналето, Хвалинска ја совлада 22-та носителка Ана Калинскаја со 7-6(3), 6-3, покажувајќи огромна психолошка стабилност и сигурност во клучните моменти од мечот. По израмнетиот прв сет, Полјачката целосно ја презеде контролата и заслужено стигна до една од најголемите победи во својата кариера.
Со овој успех, Хвалинска го израмни најдобриот резултат на една квалификантка во женска конкуренција на Ролан Гарос во Опен ерата. Последен пат ваков подвиг направи Надија Подороска во 2020 година.
Особено импресивно е што пред стартот на турнирот Хвалинска се наоѓаше на 114. место на светската ранг-листа. Таа досега имаше само две победи на турнири на земјена подлога на највисоко ниво, а на грен слем турнирите имаше запишано само една победа во главната ждрепка, остварена на Вимблдон во 2022 година.
Нејзината неверојатна приказна сега добива ново продолжение. Во полуфиналето ја очекува уште потежок предизвик, бидејќи за место во финалето ќе се бори против победничката од дуелот меѓу светскиот рекет број еден, Арина Сабаленка, и Дијана Шнајдер.
Без разлика на исходот, Маја Хвалинска веќе го постигна најголемиот успех во својата кариера и стана едно од најпријатните изненадувања на годинашниот Ролан Гарос.
