Јавното обвинителство на Република Македонија ја претстави новата Комуникациска стратегија за периодот 2026–2028 година, заедно со акциски план за нејзина реализација, со цел поголема транспарентност и подобра комуникација со граѓаните.
Државниот јавен обвинител Ненад Савески истакна дека клучниот збор што ја опишува новата стратегија е „проактивност“. Наместо институцијата да реагира само на поставени прашања, јавноста навремено ќе биде информирана за постапките и одлуките на обвинителствата, во рамки на законските можности.
„Сите обвинители не само што ќе го уживаат правото на слобода на изразување, туку ќе имаат и обврска да ја информираат јавноста за предметите по кои постапуваат, секако во границите што ги дозволува законот“, нагласи Савески.
Тој најави измени во упатството за односи со јавноста, како и унапредување на системите за интерна и кризна комуникација и подобра координација со другите институции.
Според Савески, стратегијата треба да придонесе за враќање на довербата на граѓаните во Обвинителството, преку навремени, проверени и прецизни информации.
„Предметите по кои постапува Јавното обвинителство често се во фокусот на јавноста. Затоа е неопходна добра подготовка и внимателно балансирање меѓу интересот на јавноста и законските ограничувања поврзани со истрагите“, рече тој.
Притоа нагласи дека целта е да се спречат шпекулации и сензационализам, а во јавноста да се пласираат факти произлезени од обвинителските постапки, со почитување на правата на жртвите, осомничените и обвинетите.
Савески потсети дека Јавното обвинителство е комплексен систем составен од 23 основни јавни обвинителства, четири виши обвинителства и Републичко јавно обвинителство, во кои работат околу 190 јавни обвинители.
Тој предупреди и на потребата од поголема финансиска поддршка за институцијата.
„Сиромашно Јавно обвинителство не може да се спротивстави на богатиот криминалитет“, порача Савески, додавајќи дека извршната и законодавната власт мора да обезбедат услови за ефикасно функционирање на обвинителскиот систем.
На презентацијата се обрати и заменик-генералниот обвинител на Португалија, Пауло Жорже Виеира Моргадо де Карвајо, кој нагласи дека стратешката комуникација не претставува само односи со јавноста, туку е важен дел од владеењето на правото.
„Кога институциите молчат, празнината лесно ја пополнуваат дезинформациите. Затоа комуникацијата мора да биде транспарентна, стратешка и законска“, истакна Карвајо.
Професорката Јасна Бачовска-Недиќ оцени дека стратешката комуникација на Јавното обвинителство е демократска потреба и обврска кон граѓаните.
Според неа, Обвинителството мора да биде поприсутно во медиумите на конструктивен начин и да придонесува за подигнување на правната култура во општеството.
