Претседателот на Европскиот совет, Антонио Кошта, попладнево престојува во официјална посета на земјава, каде што ќе оствари средба со премиерот Христијан Мицкоски.
Од владината прес-служба информираат дека посетата ќе започне со тет-а-тет средба помеѓу Мицкоски и Кошта, по што ќе следи проширен состанок на двете делегации. По завршувањето на разговорите, предвидена е заедничка прес-конференција во Владата.
Кошта е во регионална турнеја низ Западен Балкан, во рамки на која се среќава со лидерите од државите во регионот и учествува како ко-претседавач на самитот ЕУ – Западен Балкан, кој на 5 јуни ќе се одржи во Тиват, Црна Гора.
За време на посетите, фокусот е ставен на проширувањето на Европската Унија, постепената интеграција на земјите од регионот, како и на прашањата поврзани со регионалната соработка, безбедноста и стабилноста.
„Мојата втора турнеја низ Западен Балкан испраќа јасен сигнал дека посветеноста на Европската Унија кон регионот е реална, исто како и можноста за проширување. Моментумот постои, а сега е време за испорака на резултати“, изјави Кошта пред почетокот на турнејата.
Во Скопје тој пристигнува од Тирана, каде што се сретна со тамошните лидери. Посетата на регионот ја започна во Сараево, а во наредните денови ќе ги посети и Приштина и Белград.
Турнејата ќе заврши со посета на Црна Гора, каде што Кошта ќе учествува на самитот ЕУ – Западен Балкан под мотото „Заеднички просперитет и стабилност на ЕУ и Западен Балкан“.
