Здравствените власти во Бразил внимателно следат два случаи на можна зараза со ебола во Сао Паоло и Рио де Жанеиро, што предизвика зголемено внимание поради стравувањата од ширење на вирусот надвор од Африка. Доколку сомнежите се потврдат, тоа би биле првите регистрирани случаи надвор од африканскиот континент од почетокот на актуелната епидемија во Демократска Република Конго.
Резултатите од лабораториските тестирања се очекуваат во текот на следната недела, а бразилските здравствени служби засега нагласуваат дека нема потврдени случаи на ебола во земјата.
Во Сао Паоло, 37-годишен маж по потекло од Демократска Република Конго бил хоспитализиран со висока температура и симптоми што првично предизвикале сомнеж за ебола. Подоцна лекарите утврдиле дека боледува од менингитис.
Во Рио де Жанеиро, пак, белгиски државјанин кој пристигнал од Уганда бил ставен под медицински надзор поради кашлица, треска и дијареја. Кај него е потврдена маларија, но тестирањата за ебола продолжуваат како дополнителна мерка на претпазливост.
Актуелната епидемија во Демократска Република Конго досега резултирала со повеќе од 1.000 сомнителни случаи и најмалку 246 смртни исходи. Во соседна Уганда се регистрирани девет потврдени случаи и еден смртен случај. Здравствените експерти предупредуваат дека реалниот број на заразени може да биде значително поголем поради ограничените можности за тестирање во погодените подрачја.
Станува збор за реткиот сој Bundibugyo ebolavirus, за кој во моментов нема докажана вакцина. Стапката на смртност се проценува на околу една третина од заразените лица. Вирусот најчесто потекнува од диви животни, особено овошни лилјаци, а меѓу луѓето се пренесува преку директен контакт со телесни течности на заразено лице.
Бразилските власти уверуваат дека ситуацијата е под контрола и дека внимателно се следат сите потенцијални ризици додека се чекаат конечните резултати од тестирањата.
