Шест возачи во саботата биле лишени од слобода во различни градови низ државата поради безобѕирно управување со возила. Меѓу нив е и возач од Дебар кај кого биле измерени 2,75 промили алкохол и кој нападнал полициски службеници. Дел од случаите завршиле и со сообраќајни незгоди.
Најсериозниот случај бил регистриран во Дебар. Возач на патничко моторно возило бил лишен од слобода откако било утврдено дека управувал под дејство на алкохол. При контролата му биле измерени 2,75 промили алкохол во крвта.
Според информациите од полицијата, дебранецот предизвикал сообраќајна незгода, а потоа физички нападнал полициски службеници кои извршувале службени дејствија.
„Тој предизвикал сообраќајна незгода и физички нападнал полициски службеници кои извршувале службени дејствија“, се вели во соопштението.
Во Скопје биле приведени двајца возачи кои управувале возила под дејство на алкохол. Кај едниот, кој управувал мопед, биле измерени 1,85 промили алкохол. Вториот управувал патничко возило со исто количество алкохол во крвта и удрил во метална ограда.
Во Крушево полицијата затекнала возач кој управувал возило без возачка дозвола. Во Македонска Каменица бил лишен од слобода возач кој управувал и покрај активна забрана за управување.
Во Скопје, пак, бил приведен возач кој управувал нерегистрирано возило и без да поседува возачка дозвола.
Од Министерството упатија апел до граѓаните доследно да ги почитуваат сообраќајните правила и прописи. Оттаму предупредуваат дека управувањето возило под дејство на алкохол, без возачка дозвола или спротивно на законските ограничувања директно ја загрозува безбедноста во сообраќајот.
