Во Македонија за две години се регистрирани 9.401 повеќе болнички случаи, покажуваат најновите податоци од анализата на Фондот за здравствено осигурување за болничко лекување во периодот од 2023 до 2025 година. Според извештајот, бројот на пациенти кои биле лекувани во болници пораснал од 184.829 во 2023 година на 194.230 случаи во 2025 година, што претставува зголемување од 5,1 проценти.
Паралелно со растот на бројот на хоспитализации, зголемен е и буџетот за болничко лекување. Од Фондот наведуваат дека средствата за оваа намена достигнале 32,5 милијарди денари, што е раст од околу 24 проценти во споредба со претходниот период.
Најголемо зголемување е регистрирано кај болестите на очите и кај заболувањата на мускулно-скелетниот систем. Од ФЗО објаснуваат дека тоа главно се должи на намалувањето на листите на чекање за операции на катаракта, но и на зголемениот број ортопедски интервенции, особено операции на колкови и други планирани зафати кои биле одложувани за време на ковид-пандемијата.
Од друга страна, статистиката покажува пад кај хоспитализациите поврзани со кардиоваскуларни и циркулаторни заболувања. Бројот на случаи се намалил од 26.651 на 25.876 пациенти. Директорот на Фондот, Сашо Клековски, посочи дека дополнително ќе се анализира дали станува збор за реален тренд на намалување или за други фактори кои влијаеле врз бројките.
Пад е регистриран и кај хоспитализациите поврзани со бременост и породување, за околу 7,5 проценти. Од Фондот ова го поврзуваат со негативните демографски движења и намалениот број новородени во земјата.
Просечното болничко лекување во 2025 година траело нешто помалку од пет дена, додека просечната сложеност на интервенциите изнесувала 1,55. Во извештајот се наведува дека девет од дванаесетте општи болници бележат напредок, а Градската општа болница „8 Септември“ се издвојува со висок индекс на сложеност на интервенциите, близок до оној на клинички центар.
Податоците, според Фондот, покажуваат дека здравствениот систем лекува сè поголем број пациенти и изведува посложени медицински интеренции, но истовремено бројките ја отвораат и пошироката слика за демографските промени во државата.
