Левица најави дека ќе поднесе втора интерпелација против министерот за внатрешни работи Панче Тошковски, обвинувајќи го за сериозни пропусти во работењето на Министерството, селективна правда, непрофесионално постапување и судир на интереси.
Претседателот на партијата, Димитар Апасиев, на прес-конференција изјави дека состојбата во МВР дополнително се влошила и дека институцијата, според него, наместо да биде сервис на граѓаните, функционира како „приватна партиска полиција“.
Апасиев истакна дека интерпелацијата содржи 17 точки распоредени во шест области. Како главни забелешки ги наведе, како што рече, саботирањето на истраги, несоработката со Обвинителството за организиран криминал и непостапувањето во повеќе случаи од висок јавен интерес.
Според него, во интерпелацијата се опфатени случаи поврзани со шпионажа, надзорни проекти, дивоградби и други предмети за кои Левица смета дека институциите не постапувале соодветно.
Тој ја обвини полицијата и за селективно постапување, наведувајќи примери за различен однос во одредени политички и етнички чувствителни случаи.
Апасиев посочи и на, како што рече, полициски пропусти поврзани со случаи на семејно насилство, фемицид, врсничко насилство и непроцесуирање на пријави за сексуално насилство.
Во последниот дел од интерпелацијата, Левица отвора прашања и за наводен судир на интереси, адвокатски шеми и сомнителни тендери поврзани со министерот Тошковски.
Од партијата најавуваат дека ќе бараат политичка одговорност, оценувајќи дека перформансите на Министерството се недоволни за демократско општество.
