Според официјалните евиденции, во земјата во моментов живеат околу 2.500 дијагностицирани пациенти со мултипла склероза, додека трендот на нови случаи бележи пораст. Само во 2025 година се регистрирани 115 новодијагностицирани пациенти, информира в.д. директорот на ЈЗУ Универзитетска клиника за неврологија, д-р Јован Божиновски, на прес-конференција по повод Светскиот ден на мултипла склероза.
Тој истакна дека Клиниката работи на набавка на нов апарат за магнетна резонанца, кој ќе овозможи побрза дијагностика и поефикасна евалуација на болеста. Дополнително, за 2026 година е зголемен и буџетот за лекови и изнесува 451 милион денари.
Според него, ова зголемување ќе овозможи опфат на поголем број пациенти, од 961 пациент во 2025 година до 1.020 пациенти на терапија. При тоа, околу 600 пациенти се третираат со високоефикасна модифицирачка терапија, со цел спречување на релапси и долгорочен инвалидитет.
Од Националното здружение за мултипла склероза информираат дека започнува процес на децентрализација на третманот во три здравствени установи: Градската општа болница „8 Септември“ во Скопје, Клиничката болница во Штип и Специјализираната болница „Св. Еразмо“ во Охрид.
Од Фондот за здравствено осигурување посочуваат дека доколку пилот-фазата даде позитивни резултати, третманот ќе се прошири и во други градови, со цел терапијата да биде подостапна за пациентите и да се намалат патувањата и трошоците.
Од здружението беше промовирана и едукативна брошура за планирање семејство кај пациенти со мултипла склероза, со порака дека болеста не претставува пречка за бременост, туку дека бариерите најчесто произлегуваат од недостиг на информации и страв.
Во рамки на одбележувањето, од вечерва до крајот на неделата, зградата на Археолошкиот музеј на Македонија во Скопје ќе биде осветлена во портокалова боја, како меѓународен симбол за поддршка на лицата со мултипла склероза.
