Тренто и Јакимовски елиминирани од Виртус Болоња во драматична плеј-оф серија

Андреј Јакимовски и неговиот тим Тренто не успеаја да направат изненадување во плејоф серијата од италијанското кошаркарско првенство, откако беа елиминирани од Виртус Болоња со вкупни 3-2 во серијата.

Во решавачкиот натпревар, таканаречената „мајсторка“, Виртус славеше со 106:95, иако Тренто имаше водство по три одиграни четвртини. Сепак, домаќините одиграа одлична последна четвртина и со пресврт стигнаа до победа и пласман понатаму.

Македонскиот кошаркар Јакимовски натпреварот го заврши со шест постигнати поени и една асистенција. По завршувањето на сезоната, сè погласни се шпекулациите дека тој би можел да го напушти Тренто, а интерес за неговите услуги наводно покажува шпанската Валенсија.